Така џаболебарејќи како по обичај и игнорирајќи покани на Фејсбук, налетав на мошне необичната страница на Партијата на басисти на Република Македонија. Бидејќи имам видено група и страница за сешто, ова и не ми падна нешто толку чудно, се додека не отидов таму и не видов дека во групата има еден куп жени.
Како што знаеме од порано, ова е необично бидејќи жените не сакаат басисти. Секако, бидејќи за се во светов освен за постапките на сестра ми има некакво логично објаснување, тргнав да го побарам споменатото. Помислив да не случајно е оној Фејсбук момент на луѓе што прифаќаат било каква покана за било што па и овие така на рандом го кликнале копчето за станување обожавател. Помислив дека можеби сестра ми ги натерала да го направат тоа. Но, веднаш потоа ми текна вистинската причина.
Имено, и покрај моето интензивно истражување во темата на гитаристи и басисти, јас сум сепак старомоден дечко кога доаѓа до тие работи и не сум проверил дали жените знаат и преку Интернет да познаат дали одреден човек е басист. Претпоставувам дека не е толку лесно, барем не од првиот впечаток. А ако се групирани на едно место, тогаш само ќе можат да ги побараат таму. Со издавање на членски книшки уште повеќе би се олеснила работата.
Ова ме доведува до идеја за научно фантастичен филм. Добро, да бидам искрен, мене се ме доведува до идеја за научно фантастичен филм. Како и да е, идејата е дека во иднината, сите басисти ќе бидат законски обврзани да се регистрираат и да живеат во посебна купола каде што нема да се мешаат со остатокот од населението. Зошто баш во купола, прашувате? Бидејќи секогаш е кул да има купола во дистопичен научно фантастичен филм, а и зборот е малку смешничок.
Соу, басистите ќе живеат во куполата, повеќе со цел да се знае кои се отколку да бидат изолирани. Куполата редовно ќе ја посетуваат луѓе на кои им фали басист за во бенд. Ви текнува кога доаѓате во Охрид летно време и одма ви се ставаат луѓе што ви нудат сместување? Епа така нешто е ова, секогаш кога некој ќе дојде од надвор, возилото му го заобиколуваат десетина басисти со листови кој каков стил свири. Секако, знаеме дека не сите басисти свират, така што ќе се формираат и други дејности специфични за местото. На пример, ќе има басистичка ескорт служба, наменета за небасисти со проблеми со самодовербата. Небасистите ќе можат да му платат на одреден басист да ги дружи кога ќе излезат. Покрај басистот, другиов ќе се чувствува многу попривлечно за жените. Секако, ако испадне дека жените повеќе прават муабет со басистов него со другиов, законот наложува и двајцата да одат на тестирање.
Тестирањето не би се објаснило експлицитно во самиот филм, од причини кои подоцна ќе ви станат јасни, но за сега може јас да ви го објаснам. Се работи за обично тестирање на крвта за присуство на басисит. Басиситот е тоа што ги прави басистите непривлечни за жените. Тие што имаат многу басисит во крвта (или малку крв во басиситот) се басисти.
Да се вратиме на главната тема. На небасистите не би им се дозволило да живеат во куполата, бидејќи тоа би ја срушило целата поента на нејзиното постоење. За жени па да не зборувам. Никој не би бил толку суров да стави жени да живеат на такво место. Додуша, имав слајт недоумици околу семејствата. Што се случува ако басист случајно се ожени? Дали ќе оди да живее надвор од куполата или жената би дошла да живее внатре? Првото не ми изгледа многу веројатно – таквиот закон би бил полн со дупки и договорени бракови за луѓе што сакаат да излезат. Второто ми има многу повеќе смисла: ако жената не може да издржи да оди да живее со него таму, тогаш и онака не е бракот ништо посебно. Ако реши да остане, тогаш останатите басисти постојано ќе им се собираат на прозор за да ја гледаат жената, но на семејството нема да му биде страв дека ќе и направат нешто бидејќи се, нели, басисти. Компликацијата доаѓа ако имаат женско дете. Е, тоа не знам како би се решило, а може и да има простор за некој друг филм кој се бави баш со ова прашање.
И покрај тоа што на жените, со исклучок на условите опишани погоре, нема да им биде дозволено да живеат во куполата, сепак често ќе има жени на самиот периметар, од типот на очајни и/или одмазднички настроени према бившиот (а и екстремно пијани влегува во комбинација со овие две). Постарите и поискусни басисти (оние што се снаоѓале од пред тестирањата, регистрациите и релокациите) ќе знаат како да ги искористат овие појави.
Откако ја објаснив позадината на филмот, треба да објаснам нешто и околу неговата содржина. Како што е ред со ваквите филмови, главниот лик е релативно млад и бунтовнички настроен (ОК, ајл сеј ит: млад бунтовник) и не може едноставно да го прифати фактот дека тој, како басист, мора да го помине остатокот од животот одвоен од остатокот од општеството. И покрај предупредувањата на стариот и мудар зен-басист (лик каков што, морам да признаам, обично не е присутен во овој специфичен поджанр на научната фантастика) кој научил да живее добар басистички живот, нашиот главен лик тргнува во поход да ги прелаже властите и да покаже дека не треба да се дискриминираат басистите.
Откако ќе ја открие работата со басиситот во крвта, тој ќе најде парализиран гитарист кој ќе се согласи на трансфузија на крвта со младиот басист, теоријата биинг дека ако има небасистичка крв ќе помине како небасист. Добро, ова е приказната од Гатака, ама тоа беше добар филм. Секако, наместо на крај да [спојлери] но сепак да [спојлери], нашиот главен лик ќе открие дека не е се во крвта – басистичките жлезди лачат басисит во крвта, па не може со една обична трансфузија да се стане небасист. Како награда за ова откритие, тој ќе добие бесплатна вечера во форма на полициски пендреци.
Мислам дека Холивуд нема да ја прифати нешто многу мојава идеја за филм. Они сакаат хепиендови, што во случајов е малку контрадикторно, бидејќи не гледам како може да не е хепиенд за Холивуд ако басистот го пие на крај. Но од друга страна, тие секогаш настојуваат да ги наполнат басистичките глави со оние срања за внатрешна убавина и еднаквост што некако би било контрапродуктивно сега да издадат ваков филм.
Среќа што навистина постојат басисти, па нема да требаат многу пари за специјални ефекти.
goldsmith
Последни коментари